Die Speaker van die Nama Khoi Plaaslike Munisipaliteit, Dr. Gustav Bock, het ’n plaaslike onderneming in Okiep besoek wat inheemse plante gebruik vir die vervaardiging van skoonheidsprodukte. Hierdie besoek kom te midde van Erfenisdagvieringe, en Dr. Bock het die geleentheid gebruik om die ryk erfenis van Namakwaland en die plaaslike kleinsake te beklemtoon.
“Vandag, soos die afgelope maande, wanneer ek aan erfenis dink, dink ek aan Kraalbos, Jantjie Berend, Xhoba, Xhounibe, en Kougoed,” het Dr. Bock gesê. “Hierdie is inheemse plante uit die hart van Namakwaland, en die kennis van die Khoi en San. Dit is hierdie goue stukke wat ons streek so uniek maak en by baie van ons trots afdwing.”
Die plaaslike kleinsakeman, mnr. Robert Richards, vervaardig al vir amper ’n dekade suiwer Kraalbos produkte. Sy besigheid, wat hy met groot deursettingsvermoë en passie bedryf, het ’n toonbeeld geword van die harde werk en vasberadenheid wat Namakwaland se landskap en sy mense simboliseer.
“Met trots produseer mnr. Richards egte Kraalbos produkte. Dit is hierdie kleinsake wat swaarkry onder die druk van ’n uitdagende ekonomie. Dit verg ’n groot hart en deursettingsvermoë om klante te behou en te oorleef in hierdie mark,” het Dr. Bock bygevoeg.
Dr. Bock het ’n beroep gedoen op die gemeenskap om hierdie Erfenisdag te gebruik om plaaslike Namakwa produkte te ondersteun en kleinsake, soos mnr. Richards s’n, te help groei. Hy het ook die rol van hierdie kleinsake as kampvegters vir die welvaart van Namakwaland beklemtoon.
“Laat ons ons erfenis vier deur hierdie trots te ondersteun. Kleinsake is die ruggraat van ons ekonomie, en hulle dra by tot die bewaring van ons kultuur en erfenis.”
Last modified: September 26, 2024
